Zundag neggen maert dut ziene name eere an: een zunniger dag dan vandaage kö’j o’w haoste neet veurstellen. Strakblauwe locht, een heldere zunne en umme half tiene staot 35 leden van FTC Kotten in prachtig ni’je boksen en jeskes in helder rood en blauw met de reesfietse klaor veur d’n openingstocht van ’t wegseizoen. As ’t in Amerika was e’west, dan zoll’n ze petjes op e’had hebben met: ‘FTC Kotten first’ en dan had d’n veurzitter met völle poeha een onbegriepelijk verhaal e’hollene met als conclusie dat FTC Kotten ‘the greatest’ fietsclub van de walt is. Misschien is dat wal zo, moar hier hooft niemand dat hardop te schreeuwen en d’n veurzitter is neet zo brallerig en neet lange van stof. Bi’j FTC Kotten goat ze gewoon trappen, genieten en onderweg en noa afloop prèken.
De routes veur A-B en C-groep wordt deur e’nommene en d’r wordt af-e’sprokkene da’w mekaare an ’t ende zeet op ’t adres woar drenkskes en breudjes staot te wachten.
D’r is weer good e’investeerd in materioal: D’n eenen hef ni’je bende en een ni’jen ketting, d’n andere ni’je tandwielen en sommigen hebt ne heele ni’je fietse. In de zunne glump ’t o’w allemoale temeute en ’t geloed van 35 kettingen ovver de tandwielen klunk as ne hele batteri’je katten dee tevrène ligt te spinnen. Hoo mooi kan ‘t wezzen as ne groten groep leu in dit veurjaorsweer samen met iets bezig bunt woar ze allemoale plezeer an hebt.
Moar toch spölt d’r op d’n achtergrond ook andere zaken, want noa een kilometer of tiene bi’j Vrène zeg d’n renner noast mi’j: “I’j könt neet echt vrolijk worden van de situatie in de walt met al dee schreeuwende kearls an de macht.” Ik bedenke mi’j dat ’t bi’j FTC Kotten heel anders geet. Woar in de grote walt de schreeuwers mekaare staot te verdringen umme de baas te spöllen, hef FTC Kotten heel lange möjte motten doon umme ni’je bestuursleden te kriegen. Woar in de grote walt verstandelijk incontinente kearls de dienst oetmaakt, hef FTC Kotten met Dini Veldhuus en Marjon ten Dolle twee verstandige en sportieve vrouwleu achter ’t stuur e’kreggene. En ook Harrie Elferink hef een mooie toekomst as ni’j bestuurslid veur zich. Woar in de grote walt de alfa-mennekes ’t grootste woord hebt, bunne wi’j bi’j FTC Kotten bli’j dat juust de C-groep een veurname rolle in ’t bestuur geet spöllen.
De route van d’n openingstocht geet bi’j ’t Zwillbrock terugge ’t Koninkriek in. De zunne wordt inmiddels starker en de meesten loat de arm- en beenstukken zakken zodat ’t zunneken op de hoed schint. Een tiental leden bunt net terugge van een ‘trainingskamp’ in Spanje. Ze hadden e’hopt met broene beene terugge te kommen noar Nederland, moar ze mot toogevven dat ze in eenen morgen fietsen met de club net zo völle zunne hebt e’zeene als in ne heele wèke fietsen in Spanje. Soms zit ’t met en soms zit ’t teggen. Inmiddels demarreert unzen Sportman van ’t joar, Remon te Kortschot, een paar keere oet ’t peloton umme foto’s te maken van ’t lint van FTC Kotten fietsers.
Met een flinke lusse belandt de A-B-groep noa 57 kilometer in ’t Rommelgebargte en precies op dat moment kump ook de C-groep doar an. Samen wordt d’n openingstocht af-e’slottene met koffie, bier, soep en breudjes bal. ’t Is allemoale pais en vree en d’r wordt flink e’lachen. De grote walt kan nog een hoop leren van de gang van zaken bi’j FTC Kotten (De ‘greatest’ fietsclub van de walt….)
