Een helen trop van de A- en de B-groep steet te wachten bi’j de Lindebeumer als d’r nog een lesten renner arriveert. ‘Ik bun vandaage jeurig. D’n heelen dag!’ Meteene steet d’r een riege van zövventien man dee allemaole ’t feestvarken, den met de boek veuroet d’n jas heelemaol opvult, de hand drukt en feliciteert. Jan Willem mag dan zeggen waor ’t vandaage hen geet en zelf geet e meteene op kop fietsen umme de route naor Dinxperlo an te gevvene. Weg wiezen is zien specialiteit. Dat bleek in februari ook nog maor ens weer op d’n moutainbike. Wi’j kwamen een endeken achter Stadtlohn oet en Jan Willem bleek warkelijk een soort van fietsenden Google-maps, maor dan ook nog van weggeskes waor Google-maps nog nooit van e-heurd hef. ‘Hier links en dan gunds rechts.’, klonk ’t heel duudelijk deur de motterige zundagmorgenlocht. ‘En dan effen wieter weer rechts bi’j dat witte hekke dat vrogger greun was.’ In d’n bos bi’j Vrène ging hee zelf maor weer ens veurop fietsen. ’t Was te ingewikkeld um ’t allemaole oet te leggene, dus als jonge ganze ging d’n helen trop van FTC Kotten achter ‘m an. Daor worden ’t pad zo smal tussen de natte täkkere, da’j dachten: ‘Hier gao’w uns vaste rieden.’ Maor nee, nao een kwarteerken trappen achter Jan Willem an deur d’n dichten bos, kwamme wi’j an ’t ende keurig oet bi’j ’t gassstation in Raotum.
Ook vandaage hef Jan Willem d’r zin an. I’j könt dat meteene an ‘m zeen, as zien kop een betken naor achter geet en de rugge hol e’trokkene wordt. Als ne ende zit hee dan op de fietse, met ’t buuksken een betken veuroet. De leste tien jaor is ’t buuksken störeg iets groter e’wordene. ’t Bier nao afloop van de ritten hef daor zeker an bi’j-e’dragene. Inmiddels is ’t zo dat d’n dröppelvorm steeds better benaoderd wordt, en daordeur hef hee natuurlijk ook steeds minder last van d’n lochtweerstand. Maor ’t is neet alleene dat, waordeur hee hard kan trappen. D’n kearl is gewoon onmundig stark! Als ik achter ‘m riede, dan zee ik dat ziene rechthookige kuuten ‘m zowat oet de lange bokse knapt en de bovvenbeene hebt ‘t formaat van ne vieftig jaor olde eeke. Maor ook in ziene mouwen schient de neudige kracht te zitten: ’t verhaal geet, dat als Jan Willem met de vlakke hand een klap op de grond gif, dat daor dan zövven jaor geen grös meer greuien wil!
Vandaage kriege wi’j van ‘m ne mooie route deur ’t vrogge veurjaor. De täkkere van de wilgen liekt haoste oranje in ’t zunneken. De eerste sleedeurne bleuit en achter Varsseveld fluit d’n eersten tjiftjaf. Via d’n bult achter Barlo geet ’t terugge richting Corle. In ’t FTC Kotten peloton begunt ’t te piepen en te kraken. ‘Röstig jonges, d’r bunt d’r twee achter!’ Veuran zorgt Jan Willem d’r veur dat ’t tempo neet tevölle terugge geet. Hee hef duudelijk haost. Hee wil gauw naor de Lindebeumer. Daor wacht de ‘Weizen’ waormet nao afloop op zien verjaordag e’proost wordt!
En ’t buuksken? ’t Buuksken van Jan Willem is nao ’t proosten weer een heeeel klein betken e’greuid……
