D’n zommer waor maor gin ende an leek te kommen (zo as Gerard Cox ooit zong), was met het sloetstuk op de lesten zondag van september dan toch in ene kere veur bi’j. Dat zit zo: weer of gin weer maor nao de lesten zondag van september wordt de racefiets in e vet en achterin de schoppe e zat.
Daor kump e neet eerder weer veur d’n dag as op d’n eersten zondag in meert.(da’s traditie).
D’n eersten zondag van oktober (stiekum was ut dit jaor d’n tweeden zondag) komme wi’j bi’j mekare in ut Woold bi’j uns gewaardeerde lid Cor en Giene, veur de officiële start van ut winterseizoen. Unzen veurzitter hölt een proatjen en wi’j drinkt koffie met krentewegge en dan springe wi’j op uns stalen (noa ja staal) ros umme een kort rondje te fietsen ovver wooldse zandweage en deur ut bos. Nao afloop is d’r snert en bokbier. (da’s traditie).
Al jaoren organisere wi’j un atb-tocht (da’s traditie), maor tieden verandert en ie’j zeet steeds vaker dat leu fietst op zogenaamde gravelbikes. Dat zit, zeg maor, een betje tussen racefietsen en moutainbiken in. Vake wordt de racefietse veurzeen van starkere velgen met dikkere bende. Geschikt veur zandwegge en gravelpaden, maor minder geschikt in ut bos. Daorumme hebbe wi’j dit jaor veur ut eerst een gravelride organiseert. Op 30 oktober, startpunt Gebouw Wilhelmina in Kotten, kon ie 35, 45, en 55 km “gravel-riden”. Ut was een mooi succes met 200 deelnemmers, waorvan een groot deel ook nog ins oet Duutsland kwam (fietsen verbroederd !) Bi’j de zorgboerderíje d’n Olden Goarden van uns lid Remco en Heidi was de koffie-stop en daornao ging het richting openlucht zwembad, waor het parkoers zelfs dwars deur hen ging. Ovver ut betonpad in ut midden van het bad en onder de duukplanke deur en oppassen da’j neet in ut water vall’n. En alles werd ok nog ins vast e legd met un drone. Ene van unze leden is zelfs officieel drone-piloot !. Noa afloop was d’r bier en ne hamburger. Het is fantastisch verlopen en ik denke dat dit zeker een vervolg geet kriegen. (Joa, FTC Kotten geet met de tied met, da’s traditie 😉)
In de darde weake was de verwachting dat ut kwik inens flink naor beneden zol gaon. Dan wordt sommige leden van unze club un betjen zenuwachtig. Gin tied meer van fietsen, maor ’s nachts naor de ies-bane um daor een strakke ieslaoge neer te leggen. Het resultaat was geweldig. Op 20 november skaatsen in Winterswiek. Dat was groot nieuws en van NOS tot RTL en TV-Gelderland wol beweagende beelden zeen van dit biezondere gebeur’n. Unze sponsoren bunt d’r ok maor wat bli’j met, want de fietskeding van FTC Kotten wordt ok vake gebroekt bi’j ut skaatsen en zo komt ze vaker in beeld op enen dag dan in ut hele fiets-seizoen bi’j mekare.
De neet skaatsende leden waren uiteraard gewoon op tied vertrokken op de fietse (kwart ovver neggene bi’j de Lindebeumer), maor sommigen waren maor wat bli’j dat Marco umme twaalf uur d’n kachel in de gelagkamer an had, zodat de veute op e warmt konden word’n. (da’s traditie)
Zo zee ie’j maor: FTC Kotten is van de tradities, maor geet ok zekers met de tied met.
