’t Is kwart ovver tiene als d’n veurzitter zeg dat d’r noo wal e’fietst mag gaon worden. Een groten trop leden had effen daorveur samen ontbeten bi’j de Lindebeumer umme de opening van ’t wegseizoen te vieren. De mountainbikes staot weer op zolder en de racefietsen bunt veur d’n draod e’haald. Lange neet iedereene fietst ‘s winters op een mountainbike, dus d’r was in de zaal een lawaai van jewelste umdat d’r een hoop zaten te prèken vanwege ‘t feit ze de anderen ne zet al neet e'zeene hadden.
D’n eenen zit ’s winters op d’n mountainbike, een ander geet fietsen op ne racefietse met dikkere bände den ze ‘gravelbike’ neumt en weer een ander geet naor de sportschoole umme an ‘spinning’ te doone. En dan he’j d’r nog dee thoes op d’n ‘hometrainer’, den Tacx heet, gaot fietsen waorbi’j ze via ’t internet routes könt fietsen alsof ze wied in ’t boetenland bunt. I’j hebt de fietse thoes in de kökkene in een beugel staon, maor op ’t computerscharm lik ’t alsof i’j in Frankriek in de bargen of op ne andere plaatse bunt. Gao’j volgens d’n computer een bult op, dan löt ’t apparaat o’w automatisch zwaorder trappen. ’t Is haoste neet te geleuven, maor in de kökkene in Kotten kö’j via ’t internet de hele walt rondfietsen!
Inmiddels zit d’n helen trop van de FTC op de fietse en dan kö’j d’rekt marken wee d’r met goeie conditie de winter oet e’kommen bunt. ‘t Tempo veuran is meteene straf, alsof d’r energie oet de kearls kump, als bi’j de beeste als ze veur de eerste keere de weide in gaot.
Op de fietse kö’j ook good marken dat ’t met corona (veurlopig?) af e’loopene is. Ten eerste natuurlijk umme dat d’r weer in een grote groep e’fietst mag worden, maor i’j könt ’t ook langs de weg zeen: D’r ligt zowat geen mondkepkes meer in de barmen, en dat is de afgelopen twee jaor wal anders e’west.
De route geet vandaage deur ’t Woold, langs Brevoort en via Harreveld naor de weg van Reurle naor Grolle. Daor kump inens d’n straffen wind op kop. ’t Duurt maor effen en ik mot teggen d’n wind in al poesten as ne vette ganze. Gelukkig pakt de jongeren in de groep ’t kopwark, zodat de viefenzestig plussers achter de jonge ruggen toch nog met könt kommen. Veurzitter Rob had in zien preutjen e’zeg dat ’t ledenaantal van de vereniging noo bovven de 55 ligt. Vanoet de zaale kwam toen meteene ’t commentaar: ‘Da’s net als met d’n gemiddelden leaftied!’ Gelukkig dus dat d’r ook nog wat jongeren bi’j e’kommene bunt en ’t is helemaole mooi as dee neet bange bunt veur kopwark.
Van Grolle geet ’t wieter naor Zwolle, Meddo en via d’n rand van ’t darp weer terugge naor de Lindebeumer. ’t Is maor een ronde van 53 kilometer, maor met al dee wind: Foj, wat een trappen! Gauw naor ’t schap umme d’r eene te bestellen en dan komt langzaam de volgende groepjes binnen. De eersten hebt dan al een groot glas al dan neet alkoholvri’jen ‘Weizen’ naor binnen e’slagene. ’t Blif nog een helen zet een gezellig spul daor bi’j Marco en Marjon. Ondanks de zorgen dee momenteel van alle kanten op uns af komt, is iedereene bli’j, want: FTC Kotten is de weg weer op!
