Nao d’n tiedrit waor ovver veurige keer verslag is e doane, kon de racefietse in het vet -of in de wilgen zo a’j wilt - en d’n moutainbike a.k.a. modderfietse werd weer veur ut lechte haalt. Nog effen langs unzen fietsen-sponsor (Meerdink) veur ne kleine beurte. Wat bleek: er mos een klein dingetje vervangen worden maor dat dingetje lag op pakjesboot 12 van Ali-express, dwars in het Suez-kanaal, kortom “dat kan wal een paar maond duurn”, aldus d’n fietsenmaker. Misschien mowwe uns toch ins achter de oorne krabben of dat wat i’j wiet weg haalt (en goedkoop is) ok altied ut beste is.
Maor één en ander mocht de pret neet drukken en ne weake later dan gebruukelijk hadde wi’j weer de officiële start van ut winter-seizoen bi’j Cor en Giene in de schoppe. Nao koffie, krente-wegge en een speech van de veurzitter ging het op pad. Noa een mooie tocht deur ut Woold en Pruusen waren de weergoden uns good gezond en boeten in de zunne hewwe nog lang no-epraot onder het genot van de traditionele herfstbok. Met ne gesmeerden hals hebbe wi’j met volle borst unzen old-veurzitter Appie Meinen too e zongene. Het ging van lang zal e leaven tot ein prosit. Zeker ton Appie angaf dat hee d’n drank zol afraekenen want “Ie wordt tenslotte maor ene keare 70 ! “ Dit inzicht krieg ie natuurlijk pas as ie op respectabele leaftied bunt. Appie, nogmaals gefeliciteerd.
Ok in dizze maonden wordt er weer flink e koerst. (zelfs “die-hearts” dee ut bie de race-fietse holt: respect). Mooi was ok de ATB-tocht van FTC-Wenters met 500 deelnemmers.
Noo het Corona-spook weer opduukt, ontkomme w’j dr ok neet an. De eerste “positieve leden” bunt al gesignaleerd. Tot noo too blieft de klachten gelukkig beperkt tot een griepjen en ne weake achter de geraniums zitten (könne wi’j vast wenn’n haha). D’r was d’r ene zo bli’j dat he wear naor boeten mocht en dreks op de fietse sprong en bi’j de eerste de beste bochte d’r al weer af plearn, met as resultaat nog ne weake thoes zitten met ne blessure an d’n scholder. Dat kan iedereene overkomm’n maor ……….
Noo december an e brokkene is gowwe uns opmaken veur karst en old & ni’j en dan met goeie mood (ut mot toch ne keare better word’n) 2022 in, met nieuwe sportieve ambities.
Daor ovver volgende keare meer.
