- Details
Bi’j Cor en Gienne steet ’t bokbier al kold en d’n arftensoep is al hoaste kloar. D’n zommer is umme en de opening van ’t mountainbikeseizoen zit d’r al weer an te kommen. D’n FTC Kotten Gravelride (dat beteekent zovölle as: “ e’organiseerd hard fietsen ovver wège van gebrokken puun in ’t boetengebied”) is met hölpe van völle vri’jwilligers weer good op ’t rit e’kommene en ende september hebt FTC Kotten leden met succes met e’doane an ’t ‘WK-tiedrieden’. Dree prieze gingen noa dit Winterswieks Kampioenschap met noar Kotten: Rob Boeijink was d’n algemenen winnaar umdat hee zien gemiddelden snelheid tut op d’n honderdsten kilometer per uur nauwkeurig had veurspeld. Appie Meijnen ging met d’n daarden pries noar hoes en veur Jan Ni’jenhoes was d’n poedelpries umdat hee deur ’t missen van een bordjen in plaatse van bi’j Vivaldi hoaste bi’j Spiekerman in Meddo terechte kwam.
- Details
Ik heb d’r als ins eerder ovver e schrevvene, dat de gemiddelde leaftied van unze leden ieder jaor hoger wordt, deurdat wi’j (gelukkig) allemaole older wordt en umdat de jonge anwas nog steeds op zich löt wacht’n.
- Details
Zundag neggen maert dut ziene name eere an: een zunniger dag dan vandaage kö’j o’w haoste neet veurstellen. Strakblauwe locht, een heldere zunne en umme half tiene staot 35 leden van FTC Kotten in prachtig ni’je boksen en jeskes in helder rood en blauw met de reesfietse klaor veur d’n openingstocht van ’t wegseizoen. As ’t in Amerika was e’west, dan zoll’n ze petjes op e’had hebben met: ‘FTC Kotten first’ en dan had d’n veurzitter met völle poeha een onbegriepelijk verhaal e’hollene met als conclusie dat FTC Kotten ‘the greatest’ fietsclub van de walt is. Misschien is dat wal zo, moar hier hooft niemand dat hardop te schreeuwen en d’n veurzitter is neet zo brallerig en neet lange van stof. Bi’j FTC Kotten goat ze gewoon trappen, genieten en onderweg en noa afloop prèken.
Lees meer: Bi’j FTC Kotten löp ’t soepeler dan in de grote walt.
- Details
’t Wazzen prachtige zundagmorgensumme te fietsen ende augustus en zowat heel september. In de C-groep betekent dat völle volk en een mooien grotentrop, maor in de B-groep is ’t dunnekes met de opkomst. Vandaage ook weer: De Wooldsenköntnao ’t feest nog neet weer rechtoet fietsen, d’n enen Henk is net opa e’wordene en mot hen kraomschudden, d’nanderen Henk is jeureg en krig de kleinkindere op limonade en gebak en de Könningine van Kotten en d’nPrinsgemaol mot d’n plas ankaer’nen de windvaerenvarven veur ’t oethalen dat ovver een paar daage zal gebeuren. ’t Is daorumme dat een groepjen van maor vief man richting Gross Reken geet. Op zich geen probleem, want d’r zit een paar kaerlsbi’jdee zo starkbunt als olde botter, en dan könt de zwakkeren zich good achter de breede ruggen verstoppen.
- Details
“Verdomme wat geet ’t beroerd! Dit heb ik nog nooit e’had!” D’r steet ongeveer tachtig kilometer op d’n afstandsteller en d’n spitsen karktoren van Weseke kump in ‘t zicht. Nog een kilometer of tiene tut da’w weer bi’j de Lindebeumer bunt. ’t Slimste deel van de route, met ’t klimmen, is e’west, maor veur sommigen wèègt de laatste loodjes duudeluk ’t zwaorst.
Wi’j hebt d’r een prachtigen veurjaortocht haoste op zitten. ’t Greun an de struuken en de beume is mooi fris, vöggele fluit en de winterrogge in Pruusen kump al hoaste in de aore. Dit is fietsen zoals fietsen bedoeld is! ‘t is een prachtigen zundagmorgen in mei en van FTC Kotten is een groep van acht man ovver ne nie’je route naor Reken e’west.
