Wi’j zit lekker in ‘t naojaorszunnekenop ’t terras bi’j Marco en Marion achter een flink glas‘nattigheid’. Op ’t wiedste punt van d’n tocht van vandaage zei Ramon: “A’w terugge bunt bí’j de Lindebeumer kö’w d’r wal eene drinken, want bi’j uns is d’n kleinen Job geboren.” ‘t is een prachtigen naozommerdag, dus dat laote wi’j uns gin twee keere zeggen en bovvendien, bi’j een vereniging waor d’n gemiddelden laeftied van de leden bovven de vieftig ligt, is de geboorte van een kind ècht wal iets dat e’vierd mag word’n.
’t is weer een mooien tocht e’west vandaage. Toen vanmorgen de woorden ‘naor Lavesum’ klonken, zei Bernie nog: “Dan gao ik neet met, da’s mi’j völs te wied af.” Maor Cor zei, dat hee in zien ni’jen fietcomputer een route naor Lavesum had van maor 41 kilometer, dus met neggen man, inclusief Bernie, ging ’t toch op Lavesum af. D’n ni’jen fietscomputer bleek neet helemaol op de heugte, dus d’n henweg was toch, net als anders, tien kilometer wieter dan Cor belovved had. Bi’j d’n terugweg was ’t al neet völle better, dus in totaal stond d’r nog zowat 100 kilometer op d’n teller veurdat ’t glas ‘weizen’ besteld kon worden. Toch veulden ik mi’j nao d’n tocht nog prima, en dat was de laatste waeken ook wal ens anders e’west. De eerste kaere nao de vakantie bleek bi’j veurbeeld dat de anderen gewoon hadden deur e’traind terwijl ikzelf veural ‘vakantie’ e’had hadde. D’n rit ging naor Dinxperlo en wieter langs de ‘Aa’, maor waor of wi’j op de weg terugge langs e’gaone bunt kan ik mi’j neet herinneren. Jan en Cor haalden de zwöppe d’r ovveren ik was al bli’j dat ik de achterraa van de kaerls in ’t zicht kon hold’n. Thoes was de energie totaal op en de beene stief. Ik kon amper van de fietse kommen en de oogen stonden mi’j achter in ‘theufd.
’s Middags lag ik op de banke alsof ik een best maol smeer e’had hadde. En net op dat moment zei de vrouwe: “Kom, wi’j gaot een endeken fietsen, want noo is ’t nog mooi weer.”
Nao jao, mooi weer is ’t vandaage ook, en net a’w bi’j de Lindebeumer terugge bunt, dan kump ook de B-groep daor an. Met vieftien man wordt d’r dus e’proost op d’n toekomst van Job.
’t is al weer eene van de leste ritten van dit wegseizoen e’west. Wat in maert begon, is al weer haoste af e’loopene. Zövven maond hef ’t wegseizoen e’duurd, en zo’n dartig zundaage is d’r e’fietst. FTC Kotten is good e’west veur de economie, want d’r bunt minstens veer ni’je reesfietsen e’kocht. Naor schatting bunt d’r achtentwintig lekke baende e’west en tweehonderdvieftig liter zweet is deur de wit-rood-oranje shirts e’dröppeld. En in de pauzes hebt de leden op diverse terrasjes zo’n 126 kilo appeltaarte‘mit Sahne’ naor binnen e’warkt. Dat alles word’n dan weg e’speuld met minstens 462 köpkes koffie. Maor ’t belangriekste: D’r is ook nog e’fietst! Een enkelen ‘pensionado’ hef dit jaor wal 5000 kilometer (!!!) in de beene. De meeste anderen een stukskenminder maor ‘t gemiddelde lid zal zo’n krap 2000 kilometer op de reesfietse e’zetten hebben. Terwijl ik op ’t terras van d’n weizen zitte te drinken, bedenk ik mi’j dat dat beteekent dat de leden samen dit seizoen twee keere de wald rond e’fietst hebt. FTC Kotten GEET OP DE FIETSETWEE KEER DE WALD ROND IN ZÖVVEN MAOND TIED!!!
