Header FTCKOTTEN

Van dee momenten…

 

Op zundagmorgen umme kwart ovver negen steet dit keer de B-ploeg te popelen um op ut staolen ros te springen. Natuurlijk eerst de standaardvraoge: ‘waor geet ut hen?’ Ut antwoord kump al gauw van dree man tegelieke: ‘ovver de weg..’ En weg bunt ze!

Ut geet earst op Grünewald op an. Tenminste, at e los is. Jan Sam hef ne mooie route in de kop. En ander’n Jan, ‘de Vakantieman’, hef ne route op ziene navigatie, maor den is minder secuur en minder snel as de anwiezingen van Jan Sam. Natuurlijk ligt d’n gemiddelden laeftied wat hoger as bi’j de A-groep. Dus a’j rechts mot, dan mo’j dat wat vaker en veural harder schreeuwen. Of misschien hebt ze veurin wal iets meer tied neudig umme de cryptogrammen van Jan te ontciefer’n? Zoals: ‘bi’j dat greune hekke wat noo wit is linksaf! …LINKSAF! Nöleri’je ten top, maor wal gezellig! Ut zunneken kump d’r deur en wi’j peddelt rustig vedan. Wat kan ow gebeuren? Jao, ne lekken band van Danny.

 

Maor in ut zunneken is het heerlijk wachten. I’j zollen haoste zeggen: stek d’r nog maor eene lek… Wi’j trapt um wear an. Op ut leste moment bedech de groep zich. Grünewald kon nog wal ens dichte weaz’n, dus lao’w maor naor d’n Beer gaon. Dee bunt zeker los en de blümchenkaffee en apfelkuchen van frau Schmelting smekt daor altied alderbastend lekker. Daor an ‘ekommen wordt ut darpse feest oetgebreid geanalyseerd, de plannen veur d’n Kottensen wagen wordt deur ‘enommen en de eerste afspraken veur zaoterdagsmiddags, umme half veere bi’j ut schap, wordt emaakt. Ut enige wat wi’j noo nog mot is die Wirtin vraogen wat ze uns afnemt en teruggefietsen naor de Lindebeumer. Ut geet weer vedan. Am Bollengraben nach unten, dat geet mooi! I’j könt met een betken mazzel de 60 antikken. Net veur Knüverdarp zeet wi’j héél in de wiete een paar witte fietsen met iets oranjes. Liekt verdorie wal een paar van de unzen? Een paar honderd meter fietst ze noo veur uns. En dan kump de opmarking en de bevestiging: ut is inderdaod de A-groep!!!

Een paar man kiekt mekare an. En kiekt nog ens en ze wet van mekare wat ze denkt. Ze zet an en wilt maor één ding: oprapen, zoals ze dat neumt. As koren op de mölle! Ze zet nog ne keare an: ut spel is op d’n wagen en ze geft er ne heuse patat op. Ze springt van d’n os op d’n ezzel! Ut wisselgeld kump op taofel, ze geft d’r nog ne duftigen snok an. De beene doot ow zeer, i’j mot oppassen dat ow de spaghetti neet ovverkokt. Langzaam komme wi’j dichterbi’j. Op d’n limiet! Maor pas op, jongens: waart ow veur de chasse-patat! Ai, ze jaagt toch harder dan wi’j dachten… Ze zölt toch gin astma hebben? Immers, bewezen is da’j met astma harder könt trappen? Betekent dat dan soms den ‘A’ van A-groep? Kop ovver kop geet ut noo, wi’j komt dichterbi’j. Noo deurkachel’n! Bi’j de A-groep steet achter de deure los, dat schelt nog. De earsten pikt an, ze hebt nog veur Knüverdarp ut gat dicht ‘ereden. Dat mot ok wal, want as de grote jongens ut daor op de heup’n kriegt, bu’j nog lange neet jeurig! De achterste A-tjes kiekt verbaasd op? De B-jongens laot zich weer zakken en afpier’n en kiekt mekare vol geneugen nog effen an. Gin punten verdeend, gin bonificatie, gin bloomen, maor nog mooier…

Ach, i’j hebt zo van dee momenten… 😉

 

Ut ende van ut wegseizoen is in zicht. Dartig september was als afsloetinge ut Wenterswieks Kampioenschap Tiedried’n samen met de collega`s van Wenters. Dit jaor met een heusen ploegentiedrit. En verdraeid, undanks materiaalpech, bunt Geert te Kulve, Wim Valken, Berni van de Busker en Jan Willem Krusselbrink als winnaars met d’n beker met de grote aorne op Kotten an e’gaone!!!  

 

D’n eerste zundag van oktober is dan weer d’n aftrap van ut winterseizoen. De modderkroepers en de leefhebbers van de dikke bände könt zich weer oetlaev’n. Met warme arftensoep en kold bokbier nemme wi’j bi’j Cor en Gienne ut afgelopen seizoen nog effen deur en wordt d’r plannen e’maakt veur d’n winter. Lao’w hoppen dat ut dizzen winter ok weer van ‘dee momenten’ zal gevven…