Header FTCKOTTEN

Het is aardig fietsweer als ik teggen neggen uur op d’n veurlesten zundag in juli op de Lindebeumer af gao. Toch steet d’r maor ééne in ’t blauw-wit-oranje met de reesfietse te wachten. Hee greult mi’j an en fluustert: “Ik kanne haoste neet praoten en ik bun ok neet good te passe. I’j könt better alleene gaon fietsen, dan kö’j nog een betken vaart maken.” D’r kump wieter geen mense van de A-groep opdagen, dus stap ik in mien eentjen op de fietse veur een ronde richting Grolle, Beltrum, Borkelo en Reurle. Mooi wear, lekker fietsen, maor wal alleene. En als de greune eeken op de Grolseweg langs mi’j hen schoeft kom ik tut de conclusie dat d’r vandaage gin mense is kommen opdaagen enkel en alleene uut ‘clubleefde’ veur FTC Kotten. En zoals ze zegt: “Clubleefde is de brandstof waor elke vereniging op draeit.”

 

Effen later, terwijl ik d’n kilometerteller op ’t fietspad langs de weg tussen Grolle en Beltrum nog net in de dartig kanne hollen, is d’r ook nog tied veur wat gedachten. Dat is ’t mooie van alleene fietsen.

Toen Feyenoord veurig jaor een wedstrijd in Rome most spöllen, toen gingen d’r supporters met, dee half Rome kort en klein sloogen. “Clubleefde” neumden ze dat. 

Jos van Rey gaf in Limburg an een burgemeisterskandidaat uut de eigen parti’je de vraogen deur, dee hee kon verwachten in ’t sollicitatiegesprek. ’t Was neet kwaod bedoeld. ’t Was alleene uut leefde veur zien club.

En in Rusland leet Poetin de meeste kandidaten veur de Olympische spelen volspuiten met doping: Eigenlijk ook enkel uut clubleefde.

De weg tussen Beltrum en Borkelo is too an n’j asfalt. Foj, wat is dat daor bi’j zette onlieke. Het ‘soepel draeien’ verandert langzaam in wat de verslaggevers ‘stoempen’ neumt. Zeker a’j alleene fietst is een glad wegdeksel belangriek: I’j könt vaart holden zonder da’j echt hard hooft te trappen, en da’s good veur “de moraal”. Pas als ik later in Borkelo d’n draei naor Reurle e’maakt hebbe en ik de wind ook nog iets achter kriege, kump dat lekkere geveul van ‘veur mien laeftied kan ik eigenlijk nog hard zat’ weer terugge. Dan kö’j ook wieter met de gedachten, of zoals ze ook wal zegt: “Het leegmaken van het hoofd.” Steeds vaster rake ik d’r van ovvertuugd dat ‘clubleefde’ d’n verklaoring is veur ’t feit dat d’r vandaage behalve mi’jzelf geen mense van de A-groep is.

Clubleefde was d’r ook toen op 25 september half FTC Kotten met grote glazen bier nao zat te kaarten nao ’t WK (Winterswieks Kampioenschap) tiedrieden. Rob had d’n eersten pries bi’j ’t raoden van d’n afgelegden afstand en Henk te Selle was bienao d’n winnaar van ’t WK e’wordene. Nao ja, d’n tweeden pries is jao ook mooi!

En ook op 2 oktober toen veur FTC Kotten ’t mountainbike seizoen anving in de schoppe bi’j Cor en Gien, toen kon i’j de clubleefde haoste roeken.

Maor terugge naor eind juli: Vanaf Reurle geet ’t wear naor Grolle op an. De beene begint luk stief an te veulen, maor een paar slok uut d’n bidon en ’t gladde asfalt doot wonderen. Net nao Grolle is d’r effen twiefel in mien heufd: Zal ik nog langs Vraogender rieden of rechtdeur gaon naor ’t darp? Het antwoord is duudelijk: “A’j vandaage langs Vraogender gaot, dan kom i’j terechte in d’n drokten van de Zwarte Cross.” En dat is noe net waorumme ik vandaage alleene bunne: Gister is half FTC Kotten bier wezzen tappen op de Zwarte Cross. Dee leu offert zich op umme in al dat lawaai zo gauw as ze könt bier te tappen veur festivalbezeukers. De clubkas kump vol en de contributie kan leege blieven. En jao, helaas bunt ze dan d’n volgenden dag te slecht umme met hun eigen club te gaon fietsen. Maor ’t is veur een good doel: “Clubleefde” heet dat.