Header FTCKOTTEN

Bi’j de Lindebeumer kö’j fijn zitten, zeker as ’t boeten règent en waeit en as binnen een buffet klaor steet met breudjes, eiere, koffie en nog völle meer. Zo’n 25 leden van FTC Kotten waren deur ’t hondenweer naor Marco en Marjon e’kommene umme eerst samen te èten en dan de openingsrit van ’t wegseizoen te fietsen. 

’t Bestuur had op de vergadering belovved dat d’r een gezamelijken tocht van zo’n 50 kilometer e’maakt ging word’n. Maor toen iedereene lekker an ’t ontbijt zat, had gin mense haost umme op de fietse te kroepen. De laatste roddels oet Kotten word’n nog ens deur e’nommene, d’r word’n nog maor weer ens een köpken koffie e’ haald en hoewel iedereene ’t oranje-bauw-witte clubtenue an had, was d’r niemand den naor boeten wol. Deur ’t raam zag i’j d’n règen zowat

horizontaal ovver de roeten lopen. Af en too kwam d’r ook blad van d’n veurigen harfst of een plastic toeten deur ’t beeld e’waeid. D’n helen winter had iedereene e’klaagd dat ’t zo dreuge was, maor ’t leek of dat net op d’n dag van d’n openingsrit allemaole weer in e’haald most worden.

Hoowel,… op d’n dag dat Jan Niejenhoes zien Triastocht e’holden word’n, was ’t ook al zulk weer e’west. D’n opkomst bi’j trainingen zol soms nog wal ens wat hoger meugen, maor in règen en koldigheid een tocht organiseren zodat anderen könt genieten van ’t fietsen: Laot dat maor an de leden van FTC Kotten ovver!! D’r wazzen dit jaor haoste nog meer vri’jwilligers dan deelnemmers. Met ’t ophalen van de pijlen most de opruumploeg nog langzaam an doon umdat d’r dree Pruusen in règenpakken zo langzaam gingen dat ze teggen de wind in haoste umme veelen bi’j gebrek an snelheid. Maor o, o, wat wazzen de kearls bli’j toen ze ’t e’haald hadden. Op de parkeerplaatse bi’j Trias staken ze meteene een paar sigaretten op en naost eur auto dronken ze met de opruumploeg een flesse ‘Siegersekt’ leug, terwijl ’t règenwater van de ruggen en van de fietsen leep.

Nao d’n openingsrit van ’t mountainbikeseizoen, een paar maond gelène hoofden i’j alleene ’t stof van de fietse te blaozen want ’t was dreuger dan ooit. Maor net noo ’t wegseizoen begon, was ‘t ’t andere uuterste. Op ‘t leste reep veurzitter Appie iedereene toch maor tut de orde, en met d’n start tussen de beene ging ’t spul naor boeten. Effen ’t water van ’t zadel wrieven en dan op weg richting Eunk. Ietsken afstand holl’n tut o’w veurganger, anders ha’j ’t spatwater van zien of heur achterrad al achter de krage zitten. Langzaam ging ’t richting de grenze, maor op d’n kruusing met de Vosseveldseweg stond veurzitter Appoe al naost de fietse. Hee had ’t zin d’r af. “Jonges en dearns, lao’w hier maor links af slaon, is dat good?” Niemand protesteerden, en effen later reden 25 ‘verzoppen katten’ richting de Brinkheurne. Daor ging ’t weer links af d’n Stemerdinkweg op en effen later bi’j de Kottenseweg weer links, terugge naor de Lindebeumer.

Achteneenhalven kilometer, dat is op de reesfietse a’j langzaam an doot zo’n 20 minuten, en toen was ’t peloton weer bi’j ’t beginpunt…. De meesten stonden daornao nog een zet te prèken an ’t schap, maor toen zat d’n kortsten openingsrit oet de geschiedenis van FTC Kotten d’r toch ècht op. Wi’j hopt op mooi fietsweer veur de rest van dit jaor!